Uko imyanda yabaye igishoro kibyara inyungu kuri rumwe mu rubyiruko rw'i Butare

Umuvuduko · 2024-04-09T07:11:14+00:00

Ifumbire ikorwa mu myanda iva mu mujyi wa Huye ishimwa cyane n'abahinzi, ariko ku giciro cyayo si benshi bashobora kuyigondera Bamwe bayifata nk’ikibazo kibangamiye ubuzima ariko abandi bakayibonamo igishoro cyabyara inyungu. Rumwe mu rubyiruko rwo mu karere ka Huye ruvuga ko imyanda myinshi ituruka muri uyu mujyi ishobora kubyazwa umusaruro iramutse itunganyijwe neza kandi bigakorwa n’ababizi. Biyemeje gushinga ikigo cyo kwegeranya iyi myanda no kuyitunganya kuburyo bayikuramo ifumbire. Ni ifumbire bemeza ko ari nziza kandi ko itangiza ubutaka kuko nta binyabutabire bayongeramo nk’izindi fumbire mvaruganda. Uretse iyi fumbire, uru rubyiruko ruvuga ko hari n’ibindi byinshi bakora bivuye mu myanda itabora, nka plastiki, cyakora ngo amikoro akaba akiri makeya. Mu cyanya cyahariwe inganda cya Huye, mu majyepfo y'u Rwanda, ni ho hakusanyirizwa imyanda yose iva muri uwo mujyi. Akazi ko kuvangura imyanda gakorwa n’itsinda ry’abasore n’inkumi. Itabora igashyirwa ku ruhande rumwe, ibora igashyirwa ku rundi ruhande. Iyi ikaba ari nayo ikurwamo ifumbire. Shalom Tuyishime ni umukozi wa Greencare Rwanda Ltd, ikigo cyatangijwe n’urubyiruko kigamije kwegeranya imyanda yo mu mujyi wa Huye (Butare) kikayibyazamo umusaruro w’ifumbire. Shalom Tuyishime avuga ko igitekerezo cy'uyu mushinga cyazanywe n'abanyeshuri bigaga muri kaminuza Tuyishime agira ati: ''Ni igitekerezo cyaje mu mwaka wa 2015 kizanywe n’abasore n’inkumi bigaga iby’ubutaka muri kaminuza. "Bakabona ikibazo cy’imyanda yamenwaga ahazwi nko mu Rwabayanga. Batekereza uko iyi myanda yabyazwa umusaruro. "Iyo myanda itangira gutoranywa, ibora ikavamo ifumbire, itabora ikaba yasubizwa mu nganda igakorwamo ibindi bikoresho.'' Ni inzira ndende kuva ku myanda ikurwa mu ngo z’abaturage ukagera ku ifumbire iboneka iyo imyanda imaze gutunganywa. Tuyishime avuga ko hari amatsinda ashinzwe gutoranya imyanda itabora irimo plastiki, amashashi, amacupa, n'ibindi. Hakaba n’irindi tsinda rikora ifumbire, rigenda riyihindagura kugeza igihe iboze ikaba ifumbire. Hari kandi n’itsinda rishinzwe kuyiyungurura "kugira ngo tugire ifumbire nziza", nkuko Tuyishime abivuga. Avuga ko iryo tsinda ari na ryo riyipakira mu mifuka. Tuyishime avuga ko bafite amatsinda atatu ashinzwe gutoranya imyanda kugeza ivuyemo ifumbire Ifumbire itunganywa n’uru rubyiruko ishobora kuba kimwe mu bisubizo ku butaka bw’aka gace burimo ubusharira ndetse n’ubutagitanga umusaruro kubera guhingwa cyane. Kalisa Cassien ni umuhinzi wo mu murenge wa Huye. Ahinga cyane ibigori. Avuga ko ''ifumbire abaturage bikorera bayikora mu bumenyi bwabo bukeya. ''Ifite igihe igomba kumara mu butaka. Ariko akarusho k’iyi ni uko iramba mu butaka. Igumamo igakomeza gutunga ibihingwa." Ayishima ubwiza ariko nanone ngo haracyariho ikibazo cy’igiciro cyayo. Iyi fumbire igurwa amafaranga 100 ku kilo. Abaturage bashobora kuyigondera si benshi ugereranije n'ingano y’iyo bakenera. Tuyishime, wa wundi wo mu kigo Greencare, avuga ko na bo bazi ko igiciro kitoroheye abahinzi ariko na bo ngo ntibyaborohera kukigabanya iyo batekereje ku kiguzi gikenerwa kugira ngo bagere kuri iyi fumbire. Kuva mu mwaka wa 2017, ikigo Greencare kivuga ko gitunganya ibishingwe bivamo ifumbire iri hagati ya toni 800 na toni 1000 buri mwaka. Iyi ngo ni nkeya cyane ariko ni yo bafitiye ubushobozi bwo gutunganya. Mu gihe baba bagize amikoro yisumbuyeho, Greencare ngo yashobora kongera ingano y’ifumbire ikora kuko ikenewe cyane. Bavuga ko imashini bafite kugeza ubu nta bushobozi zifite bwo kurenza toni 1000 ku mwaka. Ikindi ngo bashobora no gutunganya imyanda itabora, nk’ikomoka kuri plastiki bakayikoramo ibindi bintu, dore ko na yo ari myinshi muri aka gace bakoreramo.

Thread starter Umuvuduko
Start date Apr 9, 2024

Umuvuduko

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

Uko imyanda yabaye igishoro kibyara inyungu kuri rumwe mu rubyiruko rw'i Butare

Umuvuduko

Member

Our Community

Regional Communities